• Fonte RSS: Para recibir os eventos nun lector de RSS. O formato RSS era moi utilizado nos 90 para recibir novas de xornais entre outras cousas, mais caeu algo en desuso e a día de hoxe. Segue a ser bastante práctico como protocolo de comunicación entre apps, iso si. Este blogue por exemplo ten o seu propio RSS: https://coegho.net/rss
• ICS/ICAL: iCal ou iCalendar é un formato aberto e estándar que permite sincronizar calendarios, que é xusto o que precisamos aquí. Os ficheiros que usan iCal teñen a extensión .ics (por iso o de ICS/ICAL) e poden instalarse directamente como ficheiros ou publicarse nunha url pública (o que se coñece como enlace Webcal).
• Lista: É un script para incrustar nunha páxina web, e onde se meta aparecerán os eventos en forma de lista. Por poñer un exemplo práctico, é o que se utiliza en acontece.gal para mostrar os resumos das distintas páxinas.
• Fediverso: O @ no Fediverso desta axenda, de forma que se pode seguir dende unha conta de Mastodon, por exemplo.

A maiores, tamén verás que hai un cadro chamado "Filtro". Aí podes indicar cancelos como filtro para que en vez de cargarse todos os eventos só se carguen os eventos que coincidan con eles, ou incluso escoller unha colección concreta se hai coleccións definidas na páxina.

Se non queremos instalar apps adicionais no móbil e temos un computador a man, podemos abrir o navegador e visitar calendar.google.com. Unha vez alí, debemos premer no icono de configuración arriba á dereita, tal e como se mostra na seguinte imaxe, e escoller Configuración:

Unha vez esteamos na configuración, debemos escoller a opción de Engadir calendario, á esquerda.

Vaise abrir un menú despregábel. De entre todas estas opcións, hai que escoller a última, A través de URL. Se tes a sensación de que esta opción está agochada para que non a vexas, confírmocho: non é unha sensación, é intencional.

Finalmente, só queda pegar a url neste cadro e premer en "Engadir calendario". Se usamos a mesma conta de Google no ordenador e no móbil, debería bastar con isto: os eventos aparecerán a próxima vez que se sincronice o calendario.

Se non queremos usar a conta de Google ou non queremos ter que encender un computador para isto, a opción máis "simple" é usar unha app. Se xa temos unha app que lea enlaces Webcal podemos usar esa, pero asumo que se estás usando este tutorial é porque até hoxe nin sequera sabías que se podían sincronizar calendarios no móbil. Non hai problema, hai unha app que é perfecta para isto, chámase ICSx⁵.

Esta app está na Play Store de Google e custa 3 euros, pero se queremos aforrar ese diñeiro (ou se non queremos usar a Play Store) o meu consello é instalar F-Droid, que é un repositorio de apps feitas con código aberto. Simplemente imos á páxina oficial de F-Droid, descargámolo e instalámolo:

f-droid.org

NOTA: Se estás lendo isto no 2027 en adiante, é posíbel que non sexas quen de instalar F-Droid, pois Google está tratando de matar os repositorios de software alternativos á Play Store para ter o control total do seu ecosistema. Se é así, síntoo, mais no momento de escribir este tutorial non sei cal será a forma de saltarse este bloqueo, se é que existe algunha.

Cando instalemos F-Droid, debemos buscar a app. A forma máis fácil e escribir "ICS" no buscador. Eu instalei ICSx⁵, pero hai outra tamén que fai o mesmo chamada Calendar Import-Export, supoño que valerá tamén (non a probei).

Unha vez instalada a app, abrímola e dámoslle os permisos que pide para acceder ao calendario. Tamén nos pide que desactivemos as optimizacións de batería da app para que Android non a mate mentres está en segundo plano, o cal semella unha boa idea tamén (do contrario a sincronización non funcionaría). Finalmente, dámoslle ao signo "+" para engadir un novo calendario.

E finalmente engadimos o enlace que copiamos antes, e con isto rematamos:

Se seguimos correctamente todos os pasos, en canto se sincronice o calendario comezarán a aparecernos os eventos.