Proxectos persoais
Aquí publicarei algúns dos proxectos que fun facendo pola miña conta os últimos anos. Non todos van ser bos e a maioría están sen rematar, así que non xulguedes.
pontevedra.social
Axenda online para publicación de eventos e actividades por parte de coletivos organizados, tanto en Pontevedra cidade como na comarca de Pontevedra. Creado con Gancio, e accesíbel dende a web, dende o Fediverso (@calendario@pontevedra.social), RSS, calquera app de calendario que permita calendarios remotos, así como Telegram e Bluesky.
- Bluesky bridge for Gancio: Plugin para Gancio que permite publicar automaticamente os eventos en Bluesky. Feito a partir do equivalente de Telegram. Código dispoñíbel en Framagit.
As Herbas de San Xoán
O primeiro xogo que fixen en Godot, é un maze game que consiste en atopar as herbas de San Xoán no medio da fraga antes de que te atrapen as criaturas da noite. Está dispoñíbel para xogar en itch.io dende o navegador. O código está dispoñíbel en Github.
Errepegá
O meu segundo xogo publicado, é un RPG moi sinxelo e breve que fixen para a Amorodo Jam 2025. Está inspirado na segunda xeración de Pokémon. Tamén se pode xogar dende o navegador en itch.io. O código está en Github.
Traducións ao galego
Montei unha instancia de Weblate na que aloxo os proxectos de tradución ao galego que comezo. 100% aberta ao público, calquera persoa que queira contribuír é benvida.
- Crusader Kings 2: O primeiro proxecto de tradución no que me metín, obviamente inabarcábel para unha soa persoa... Debido a un erro de importación aparece que está traducido o 92%, en realidade o número é moito máis baixo. Ten un grupo de Steam que é este.
- Kenshi: Lixeiramente menos inabarcábel que o Crusader Kings 2, pero chégalle de carallo tamén.
- Módulo de Ars Magica de FoundryVTT: Este nin sequera está comezado porque deixei de usar FoundryVTT (abrín isto durante a pandemia do 2020), pero aí quedou. Sería necesario actualizar os ficheiros orixinais en inglés, agora que todos os conxuros do Ars Magica teñen unha licencia aberta.
- Cassette Beasts: Para variar, tamén sen comezar, o cal dame bastante rabia porque é un dos meus xogos preferidos.
- Tzar: Este está traducido ao 100%. Podes atopar o addon aquí.
- Wafrn: Porque non todo van ser traducións de xogos, aquí está a tradución completa de Wafrn, a rede social que conecta tanto co Fediverso por ActivityPub como con Bluesky por ATProto. Xa está subida como PR á súa rama de desenvolvemento, é cuestión de tempo que a suban a produción.
